Ստյոպա Սաֆարյանը ֆեյսբուքյան իր էջում գրել է․
Երեկ հատուկ գրառումով արձանագրել էի, թե որտեղից է դուրս եկել լուրը, որ “գեներալ Մուրադովի հետ ինքնաթիռով Հայաստան են եկել թուրքեր և ադրբեջանցիներ, որոնք պետք է Մեղրիում ճանապարհի չափուձև անեն Նախիջևանի հետ կապվելու համար”։ Ֆեյք օգտատիրոջից բացի “լուրը” առաջինը տպագրել էր Հրապարակ կայքը՝ հղում անելով իր “աղբյուրին”։ “Լուրն արտատպելու” շքերթում երկրորդը 168.amն էր, ապա Անալիտիկը, Armday.am, իսկ մնացած անհայտ կայքերի մասին չգրեմ։
Այդ լուրն առաջինը ու հեղինակի անուն ազգանունով տպագրած Հրապարակ կայքը այսօր գնում է և, ով “հաճելի զուգադիպություն”, գեներալ Մուրադովին բռնացնում այն պահին, երբ նա Ռոբերտ Քոչարյանի ընկերոջ հետ ճաշի գնալիս է եղել, որի մասին լուր է տալիս։ Դա դեռ մի կողմ։
Հանրության ալեկոծած լուրի՝ գեներալ Մուրադովի հետ Հայաստան եկած թուրք և ադերբեջանցի պատվիրակության մասին հարց տալու փոխարեն Հրապարակի լրագրողը դնում ու սկսում է փորփրել գերիների հարցը, երբ դրա հետ կապված “պարզաբանումներ” լավ թե վատ տրվել էին /Ավինյանի գրասենյակ/, իսկ փաստը, որ հայ ռազմագերիները չեն վերադարձվել, ավելին էր, քան հանրահայտ անվանելը։ Մինչդեռ Հայաստանում գտնվող թուրք և ադրբեջանցի “հյուրերի” փաստը, ինչպես Հրապարակն էր տվել, “հավաստի էր”, “առաքելությունը”՝ նույնպես, իսկ լուրն էլ ՊՆ-ը դեռ չէր հերքել։ Կամ եթե անգամ հերքած լիներ ու Հրապարակն էլ դրա մասին իմանար, միևնույնն է՝ կայքին դա չպետք է արժանահավատ թվար, որովհետև ինքը իր աղբյուրից 100 տոկոս ճշգրտությամբ գիտեր, որ դա այդպես չէ՝ գեներալ Մուրադովի հետ եկած թուրքերն ու ադրբեջանցիները պետք է որ արդեն Մեղրիում չափուձև անելիս լինեին։
Ու հարգելի լրագրողին ուզում եմ հարցնել․
-Միթե՞ ձեր կայքի կողմից տարածված այդ “հավաստի” լուրը ճշտելն ու վերահավաստիանալը կարևոր չէր ու հարց չունեիք դրա մասին գեներալ Մուրադովին, քան ֆիքսելը, թե նա ում հետ է գնում ռեստորան ճաշելու։
-Միթե՞ դուք հարց չունեիք տալու, թե ինչ “թուրքերի ու ադրբեջանցիների է բերել նա իր դատարկ ինքնաթիռով” /նա, իհարկե, ոչ մեկի էլ չէր բերել/․․․
Ու բազում նման հարցեր․․․
Այն, ինչ անում եք ձեր/մեր հասարակության հետ, ուղղակի չի կարելի․․․