-«Բարգավաճ Հայաստան» կուսակցությունը` Գագիկ Ծառուկյանի գլխավորությամբ, մարզային այցեր է իրականացնում և հավաքագրում է մարդկանc հուզող խնդիրները, որոնց մասին կբարձրաձայնեն ԱԺ լիագումար նիստերին։ Ծառուկյանն անդրադառնալով կրթության չափորոշիչներին՝ ասել է, որ մարդկանց 90%-ը դեմ է դրանց և այս համատեքստում խոստացել է մեծ հանրահավաք կազմակերպել։ Տիկի՛ն Դավոյան, ինչո՞վ եք բացատրում ԲՀԿ-ի այս ակտիվացումը, արդյոք սա ընդդիմության խոստացած թեժ աշնան սկի՞զբն է։
-Ժողովրդին հուզող բազմաթիվ խնդիրներ կան, որոնցից բոլորս ենք տեղյակ, իսկ մարդկանc հուզող հարցերը հաստատ ԲՀԿ-ին ընդհանրապես չեն հուզում, և նրանք զբաղվում են այն հարցերով, որոնք իրենց համար հետաքրքրություն են ներկայացնում՝ քաղաքական դիվիդենտներ շահելու նպատակով։ Թե ինչ խնդիրներ կհավաքագրեն նրանք՝ դեռ կտեսնենք։ Կարծում եմ` դրանք լինելու են այն հարցերը, որոնց վերաբերյալ կա մի խումբ քաղաքaցիների քննարկում, և այդ հարցերի վերաբերյալ որոշ պատգամավորներ կսկսեն կրկին ամբիոնից բարձրագոչ հայտարարություններ անել, և այդ հարցերն այդպես էլ կմնան, որովհետև դրանք առանձնապես ո՛չ հուզել են, ո՛չ էլ հուզելու են, ուղղակի նրանց պետք է, որ ամբիոնից ինչ-որ բաներ խոսեն։
Կրթական չափորոշիչներից խոսելուց առաջ Ծառուկյանը նախ պետք է պատկերացում ունենա դրանց մասին։ Ծառուկյանն առաջին հերթին պետք է սկսի գրագետ և հասկանալի հայերեն խոսել, որ իր խոսքը հասկանալի լինի հանրության բոլոր շերտերին, ոչ թե իր թիկունքում կանգնած մի հինգ-վեց պատգամավորի, որոնք ստիպված պիտի ծափահարեն և ողջունեն նրա խոսքը՝ անկախ նրանից հասկացան, թե չհասկացան։ Այդ մարդը, որն անգամ խոսքի մշակույթ չունի, խոսում է չափորոշիչներից, որոնցից ընդհանրապես գաղափար չունի։ Հանրահավաքների մասով՝ ո՞վ է մասնակցելու այդ հանրահավաքին, իրենք էլի գնալու են, իրենց աշխատողներին տանեն, կանգնեցնեն այնտեղ, և իրենք խոսեն, իրենք լսեն, ուրախանան և ծափահարեն։
-Գագիկ Ծառուկյանի դեմ քրեական գործեր կան հարուցված, հաշվի առնելով այս հանգամանքը, ինչ եք կարծում, ո՞ր քաղաքական ուժերը կմիանան ԲՀԿ-ին։
-Կմիանան իրենց քաղաքական ուժեր հռչակած այն մարդիկ, որոնք անկախ հարցի էությունից, հիմքից, պատրաստ են որևէ ձևով իրենց խոսքը լսելի դարձնել։ Նրանք բոլորը մակերեսային խնդիրներ բարձրացնողներ են, խոսում են խնդրի այն մասից, որը իրենց է հարմար և իրականության հետ կապ չունի, անգամ, եթե իրականության հետ կապ էլ կա, այդ խնդիրներն այնպես են ներկայացնում, որ իրականությունն աղճատվի։ Այսինքն՝ այդ մարդիկ լուծում են իրենց խնդիրները, փորձում են քաղաքական դաշտում կենդանի մնալ՝ կեղծ օրակարգերով։
-ԲՀԿ-ից ասում են, որ բավական է Գագիկ Ծառուկյանը խոսի, իշխանական թևում իսկական իրարանցում է սկսվում։ Ինչու՞ եք իրար խառնվում, տիկի՛ն Դավոյան։
-ԲՀԿ-ի ղեկավարի խոսքերին, երբ անդրադառնում ենք, չի նշանակում, որ անհանգստանում ենք կամ այդ խոսքերն այնքան ճշմարիտ են, որ դրանց պետք է անպայման արձագանք տրվի։ Արձագանքում ենք այնքանով, որքանով մեզ հարց են ուղղում լրագրողները կամ քաղաքացիները։ Այդ խոսքերն, իրականում, այդքան էլ կարևոր չեն, որ ուշադրություն դարձնենք և փորձենք վերլուծել կամ լուրջ վերաբերվել դրանց։
-ԲՀԿ-ի քաղաքական ակտիվացումը ոմանք կապում են Ծառուկյանի դեմ հարուցված քրգործերով, Դուք և՞ս այս տեսակետին եք, թե՞ այլ պատճառ եք տեսնում։
-Նրանք և՛ քրեական գործերի, և՛ իրենց կուսակցության արժեզրկման ֆոնին, փորձում են ամեն կերպ մոռացության մատնել անցյալի իրենց սխալները, ղազագրերը և այլն։ Բայց մենք գիտենք, թե իրենք ովքեր են և այս պարագայում լուրջ վերաբերվել այդ մարդկանց՝ անլուրջ եմ համարում։
-Տիկի՛ն Դավոյան, սեպտեմբերի չորսին հանրահավաք է կազմակերպում «Ռեֆորմիստների» կուսակցությունը, Ծառուկյանի խոստացած հանրահավաքն էլ մոտ ապագայում կլինի, արդյոք Ձեր իշխանությունը այնքան է ձախողե՞լ, որ հանրության մոտ առաջացել է այնպիսի դժգոհություն, որը նրանց դուրս կբերի հրապարակներ։ Վերոնշյալ քաղաքական ուժերը կկարողանա՞ն մարդկանց համախմբել իրենց շուրջ։
-Բոլոր իշխանություններն էլ ունեն թերացումներ, չկա մի իշխանություն, որից ողջ հանրությունը գոհ լինի։ Ինչ վերաբերում է Ձեր նշած քաղաքական ուժերի կողմից որևէ հանրահավաք, որևէ դժգոհություն առաջնորդելուն՝ համարում եմ շատ ծիծաղելի, որովհետև այդ մարդիկ իրենց քաղաքական անցյալով, ներկայով, նույնիսկ իրենց թիմի անդամներով, չեն կարող որևէ լուրջ ընդդիմադիր շարժում առաջնորդել։ Քաղաքական ընդդիմություն կարող են լինել այն ուժերը, որոնք իսկապես մտահոգված են երկրի ապագայով, որոնք չեն եղել բազմաթիվ քաղաքական պայմանավորվածությունների կենտրոնում, որևէ կերպ չեն արատավորել իրենց անունը, իսկ Ձեր նշած անձինք երբևէ այդ շրջանակի մեջ չեն կարող տեղավորվել։
Նյութի աղբյուր — NewArmenia.am