Արթմեդ բժշկական վերականգնողական կենտրոնի ֆեյսբուքյան էջից գրում են․
Հիշում եք այս երիտասարդին՝ Գագիկ Մկրտչյանն է: Խոստացել էինք կրկին պատմել իր առողջության մասին:
Բարեբախտաբար այս նկարն արդեն հին է, քանի որ 31-ամյա Գագիկ Մկրտչյանն այլևս անվասայլակի կարիք չունի. այսուհետ կկարողանա ինքնուրույն տեղաշարժվել Արթեդ ԲԿ Վնասվածքաբանության և Օրթոպեդիայի բաժանմունքի ղեկավար Արտակ Գալստյանի կատարած բարդ և պատասխանատու վիրահատությունների արդյունքում:
Մի քանի օր առաջ կատարվեց երկրորդ միջամտությունը, տեղադրվեց հատուկ ֆունկցիոնալ ու թանկարժեք մեգապրոթեզ Օռլանդոյի հայերի ֆինանսական աջակցության շնորհիվ: Գագիկ Մկրտչյանը արդեն էնտուզիազմով լի է, ասում է շուտով ֆուտբոլ եմ խաղալու 
Երեք երեխաների հայր է, ու կյանքով լեցուն, ցանկացած դժվարության նայում է որպես փորձություն, որի միջով ուղղակի անցնել է պետք, հատկապես երբ նպատակ ունես հաղթելու դժվարություններին:
Գագիկ Մկրտչյանը կոնք-ազդրային հոդի բավականին լուրջ բեկորային վնասվածք էր ստացել Ջաբրաիլում հոկտեմբերի 18-ին: Մինչ այօսր հասցրել է մի քանի վիրահատություններ տանել: Այլ հիվանդանոցում կատարված վերջին վիրահատության ժամանակ մետաղական կոստրուկցիա էր տեղադրվել, սակայն վիրահատությունից հետո, ցավոք, ոսկրային հյուսվածքի կպում տեղի չէր ունեցել, արդյունքում սկսվել է ճիշտ հակառակ պրոցեսը՝ ոսկրային հյուսվածքի քայքայում ու զարգացել ինֆեկցիա: Ու հենց այս փուլում Գագիկի հետ կապվել էին ԱՄՆ-ից Հայաստան ժամանած Անտոն Բալասանյանը և նրա կինը՝ Մարինա Վարդանյանը, ովքեր որոշել էին ֆինանսական աջակցություն ցույց տալ պատերազմից տուժած տղաներին: Ու դիմել առաջատար մասնագետ Արտակ Գալստյանին վիրահատությունները կատարելու համար:
Որոշում ընդունվեց կրկին կատարել վիրահատություն երկու էտապով. «3 ամիս առաջ առաջին էտապով իրականացրեցինք մետաղական կոնստրուկցիայի հեռացում: Վիրահատությունն անցավ բարեհաջող: Շուրջ 3 ամիս անց արդեն կատարեցինք երկրորդ վիրահատությունը, որի ընթացքում հեռացրինք ազդոսկրի վերին գլխիկը, որը գրեթե անկենսունակ էր և տեղադրեցինք սովորական էնդոպրոթեզներից տարբերվող բավականին թանկարժեք մեգաէնդոպրոթեզ հատուկ երկար ոտիկով, որպեսզի Գագիկը նորից կարողանա քայլել: Հատուկ էնդոպրոթեզը նախատեսված է դեպքերի համար, երբ չկա ոսկրային, մկանային հյուսվածք, ու էնդոպրոթեզը ֆիկսվում է ազդրի միջին ստորին երրորդականի շրջանում, ի տարբերություն ստանդարտ պրոթեզների, որոնք ֆիկսվում են պրոքսիմալ շրջանում: Ու այս վիրահատությունը հնարավոր դարձավ Օռլանդոյի հայերի շնորհիվ, քանի որ պրոթեզը շատ թանկարժեք էր, ու հավանական չէր այն անել պետական ֆինանսավորմամբ:», -պատմում է Արտակ Գալստյանը՝ ողջունելով Օռլանդոյի հայ համայնքի նախաձեռնողականությունը:
Գագիկ այսօր արդեն դուրս գրվեց հիվանդանոցից՝ վստահ, որ կրկին վերադառնում է լիարժեք կյանքի:
