Երեկ ցերեկվանից, մինչ հայտնի կդառնար, որ գերիների վերադարձը կրկին հետաձգվում է և հակառակորդի կողմից նոյեմբերի 9-ի եռակողմ հայտարարության 8-րդ կետը ի կատար չի ածվում, անհետ կորածների հարազատները փակեցին ՊՆ բոլոր մուտքերը։ Այնպես, որ պաշտպանության նախարարն ու ՊՆ աշխատակիցները ողջ գիշեր մնացել էին նախարարությունում։ Բացի դա՝ այսօր գերիների հարազատները Շիրակի մարզում փակեցին մարզ տանող բոլոր ճանապարհները։
Գերիների ու անհետ կորածների հարազատների մի մասը շարունակում են ակցիան ՊՆ-ի դիմաց։ Նրանք մեքենաներով և այլ միջոցներով փակել են նախարարության բոլոր մուտքերը։ Ինչ վերաբերում է նրանց պահանջին, ապա մի մասը հանդիպում էր պահանջում պաշտպանության նախարար Վաղարշակ Հարությունյանի հետ, իսկ մի մասն էլ՝ պարզապես իրենց երեխաներին։
Ուշագրավ է, սակայն, որ այսօր, երբ Պնախարար Վաղարշակ Հարությունյանը դուրս էր եկել ՊՆ շենքի բակ, նախարարի հետ հանդիպում պահանջողներից ոչ ոք նախարարին մոտենալու ցանկություն չէր հայտնել և չէր փորձել նրա հետ խոսել։
Առնվազն տարօրինակ է, որ ցերեկը նախարարի հետ հանդիպման համար ՊՆ դարպասները պոկող հարազատները առավոտյան չէին ցանկանում հանդիպել, խոսել Պնախարարի հետ։
Նկատելի է նաև, որ բողոքի ակցիայի կազմակերպիչ Արսեն Ղուկասյանը վերջին շրջանում հաճախ է քաղաքական գնահատականներ տալիս կառավարության գործունեությանը, կառավարությանը մեղադրում անգործության մեջ։
ՊՆ առաջ այսօրվա բողոքի գործողություններին մասնակցում էին նաև «Դվին» հյուրանոցի սեփականատեր, վերջերս քաղաքականություն մտած ու Ռոբերտ Քոչարյանի աջակից համարվող Արտակ Թովմասյանի՝ «Դվինի» Արտակի մարդիկ։ Հենց նրանք էին ակտիվ կերպով հրմշտում ոստիկաններին ու բարձրանալով ՊՆ դարպասի վրա՝ պոկում այն։
Վերջերս էլ մամուլը գրել էր, որ գերիների, անհետ կորածների որոշ հարազատների ուղղորդում են։ Իհարկե, նրանց թվում կան բազմաթիվ քաղաքացիներ, որոնք ակցիաներ են իրականացնում իրենց որդիների վերադարձի կամ հայտնաբերման համար, սակայն նրանց շարքերում կան քաղաքացիներ, որոնց որդիները կա՛մ վերադարձվել են, կա՛մ հայտնաբերվել, դիակները ճանաչվել ու հանձնվել են նրանց։
Իսկ ուղղորդողն ու ֆինանսավորողը՝ վերջերս քաղաքականություն մուտք գործելու մասին հայտարարած Արտակ Թովմասյանն է՝ «Դվին» հյուրանոցի սեփականատերը՝ «Դվինի Արտակը»։ Ըստ մամուլի հրապարակումների՝ պատահական չէ, որ այդ ակցիաներին հաճախ մասնակցում «Միասնություն» դաշինքի ղեկավար Արման Վարդանյանին, որն էլ հենց կոորդինացնում է այդ գործողությունները՝ անհետ կորած մեր հայրենակիցների վիշտն օգտագործելով քաղաքական դիվիդենտներ շահելու համար:
Նկատենք նաև, որ նորահայտ քաղաքական գործչի՝ Արտակ Թովմասյանի անունը կապվում է ՀՀ երկրորդ նախագահ, ամբաստանյալ Ռոբերտ Քոչարյանի հետ։
Քաղաքագետ Ռուբեն Մեհրաբյանի համար հասկանալի չեն, թե ՊՆ-֊ի դիմաց հավաքված, կամ ճանապարհներ փակող մարդիկ ի՞նչ հարց են լուծում այդպիսով։ Նրա խոսքով՝ այդ ամենը ցույց է տալիս, որ որոշակի ուղղորդում կա ծնողների գործողութուններում։ «Միանշանակ ուղղորդում եմ տեսնում այդտեղ։ Հակառակ դեպքում ոչ մի կերպ չեմ հասկանում այդ ամենի իմաստը։ Ի՞նչ խնդիր են լուծում այդ գործողություները անելով։ Այդ հարցի պատասխանը միանշանակ չկա։ Գործողությունը կա, բայց պատասխանը չկա։ Պարզ չի, թե այդ գործողությունները ինչով են առաջ գցում գերիների վերադարձի հարցը։ Ոչ մի բանով։ Բայց արվում են այդ գործողությունները և շատ լավ կազմակերպված։ Հետևաբար այստեղ հարցեր են առաջանում»,- Civic.am-ի հետ զրույցում ասաց Մեհրաբյանը։
Ինչ վերաբերվում է հարցին, թե ում կողմից են դրանք ուղղորդվում և ինչ նպատակով, քաղաքագետը նշեց, որ այստեղ երեք տարբերակ կա. տարբերակ առաջինն այն է, համատեղ հայտարարությունից 5 ամիս անց հստակ է միայն մի բան, որ Ռուսաստանը ի վիճակի չէ կյանքի կոչելու հայտարարության 8-րդ կետը։
«Լավագույն դեպքում Ռուսաստանը ի վիճակի չէ, իսկ ավելի վատ դեպքում Ռուսաստանը «փայ է մտնում» այս հարցի չլուծմանը և այս հարցի չլուծումը օգտագործում է ընդդեմ Հայաստանը։ Ավելին՝ չի խորշում նաև այս գործոնը նման ոչ ազնիվ մեթոդներով գործածել ընդդեմ ներքաղաքական կայունության, որի կարիքը ունի Հայաստանը, քանի որ գնում է ընտրությունների»,-ասաց Մեհրաբյանը՝ հավելելով, որ երրորդ և ամենավատ տարբերակն այն է, որ Մոսկվան գործարքի մեջ է Բաքվի հետ։ Եվ ստացվում է, որ գերիների հարցը լուծում չունի, քանի դեռ Հայաստանի Հանրապետությունը նման հրատապ հարցի լուծումը փնտրում է միայն Ռուսաստանում։ «Ռուսները մեզ խաբելու են, քամելու են մինչև վերջ, մաշացնելու են մեր ողջ բարոյական , քաղաքական ներուժը, վարկաբեկելու են իշխանությանը այնքան ինչքան հնարավոր է, երկիրը վերածելու են ավերակների բառի ամենալայն իմաստով։ Իսկ գեներալ Մուրադովի այսօրվա հիստերիկ արձագանքը ուղակի մակերեսին է դնում ռուսների իրական վերաբերմունքը այս ամեն ինչին»,-ասաց Մեհրաբյանը ։
Մեր հարցին՝ հայաստանյան ո՞ր շրջանակներն են սպասարկում այդ օրակարգը, քաղաքագետը պատասխանեց.«Այդ ուժերի առկայությունը Հայաստանի քաղաքական դաշտում իրենց ողջ ռեսուրսով և այն փաստը, որ նրանք որպես պրոքսի ուժ են հանդիսանում Ռուսաստանի համար, ուղակի պարզ ապացույցն են հիմնավորվածության այն ամենի, ինչ ես ասացի»,-եզրափակեց Մեհրաբյանը։
Քաղաքագետ Ստյոպա Սաֆարյանը Civic.am-ի հետ զրույցում ասաց, որ չի կարող չճշտված տեղեկությունները մեկնաբանել, ենթադրություններ անել, բայց մարդկայնորեն հասկանում է, որ ծնողները բոլորից առավել շատ են ցանկանում օր առաջ վերադարձված տեսնել իրենց զավակներին։
«Իրավիճակը բավականին տեսանելի է այն առումով, որ Ադրբեջանը փորձ է անում այս բավականին զգայուն խնդիրը դարձնել Հայաստանի ներքաղաքական կյանքի վրա ազդելու գործոն։ Եվ նաև, հանուն արդարության, նկատում եմ, որ փորձ է արվում նաև լարվածություն առաջացնել հայ-ռուսական հարաբերություններում, որովհետև ակնհայտորեն Ռուսաստանն է հայտարարության 8-րդ կետի կատարման պատասխանատուն։ Ես սա տեսնում եմ, իսկ թե որքանով են հայաստանյան այլ շրջանակներ նպաստում դրան, չեմ կարող ասել»,-ասաց քաղաքագետը։
Ի՞նչ խնդիր էին լուծում «Դվինի» Արտակի մարդիկ՝ ՊՆ դարպասը պոկելով․ «Անհետ կորածների ու գերիների հարազատներին ուղղորդում են». Civic.am
