Մայիսի 5-ին համացանցում տեսանյութ տարածվեց, որտեղ այգում բաց դաս անցկացնող տարրական դասարանի երեխաները ուսուցչի ներկայությամբ վանկարկում էին «Նիկոլ դավաճան», իսկ նկարահանողները ողջունում էին երեխաների կոչերը և հորդորում կրկնել դրանք։
Ավելի ուշ պարզ դարձավ, որ տեսանյութում 5165 կուսակցության առաջնորդ Կարին Տոնոյանին պատկանող «Հայ Ասպետ» դպրոցի սաներն էին, իսկ ուսուցիչը նույն դպրոցի նկարչության ուսուցչուհի Ցողիկ Ոսկանյանն էր։
Երեխաներին ատելության քարոզչության մեջ ներքաշելու առթիվ հրապարակումներից 2 օր անց Կարին Տոնոյանը ֆեյսբուքյան էջում դժգոհել էր․ «Սրբերի շորեր հագած լրագրողները փորձում են մեղադրել դպրոցին և երեխաներին՝ ատելության նման դրսևորման համար»։ Եվ սա այն բանի համար, որ լրագրողները փորձել են պարզել, թե ինչու են երեխաները ներգրավվել նմանատիպ գործընթացներում։
Տոնոյանը նաև պաշտոնապես մեղադրել էր երկրի վարչապետին, իշխանություններին «իրենց վարած հակազգային և ապիկար քաղաքականության համար, որի արդյունքում երկրում նման հակադաստիարակչական, հակամարդկային ատելության մթնոլորտ և միջավայր է ստեղծվել»։
«Հիշեցնեմ նաև, որ այդ մթնոլորտի ձևավորումը սկսվել է դեռ 2018թ.-ի այն անիծյալ օրերին, երբ Նիկոլ Փաշինյանի գլխավորությամբ Հանրապետության հրապարակի բեմ էին բարձրացնում 10-11 տարեկան երեխայի, որը փողոցային բառապաշարով անվանարկում ու անպատվում էր այդ պահին գործող իշխանություններին….», — անթաքույց ատելությամբ գրել էր Տոնոյանը։
Նա նաև հավելել էր, թե ԿԳՄՍՆ-ին, քաղաքապետարանի աշխատակազմին և ոստիկանությանը վաղուց սպասում են դպրոցում, որ ցույց տան, թե «ինչ է նշանակում ազգային և ասպետական դպրոց ու կրթություն»:
Civic.am-ը հարցում էր ուղարկել ԿԳՄՍ նախարարություն՝ պարզելու համար, թե ինչ միջոցներ են ձեռնարկվել երեխաներին նմանօրինակ միջադեպերից զերծ պահելու համար և երեխաներին ատելության քարոզչության մեջ ներգրավվելու համար արդյոք դպրոցի նկատմամբ պատասխանատվության միջոցներ ձեռնարկվե՞լ են, թե՞ ոչ։
ԿԳՄՍ-ից մեր հարցմանը պատասխանելով՝ տեղեկացրել են, թե «Հայ ասպետ» դպրոցից պարզաբանում են պահանջել դեպքի առթիվ և կից ուղարկել դպրոցի տնօրեն Կարին Տոնոյանի պաշտոնական պարզաբանումը, որտեղ մասնավորապես ասված է.
«Որոշ լրատվության միջոցները իրար հերթ չեն տալիս մեղադրելու դպրոցին և ուսուցչին (որը փորձում է լռեցնել նրանց)՝ երեխաների մեջ նման ատելություն սերմանելու համար: Իսկ իրականում երեխաները, ըստ դասացուցակի, դուրս էին եկել այգում անցկացնելու նկարչության դասը…, և տեսնելով ցուցարարների այն խմբերին, որոնց իրենք ամեն օր ժամերով տեսնում են իրենց հեռուստաէկրաններից և լսում իրենց վանկարկումները, բնականաբար, մանկական ոգևորվածությամբ կրկնել են դրանք»։
Տեսանյութից, սակայն, ակնհայտ երևում է, որ ուսուցչուհին ոչ միայն չի փորձում լռեցնել երեխաներին, ինչպես պնդում է Կարին Տոնոյանը, այլև ժպիտը դեմքին, ինքնագոհ, գլխով համաձայնության նշան է ցույց տալիս, իսկ նկարահանողները հորդորում են երեխաներին կրկնել ատելության խոսք և վիրավորանք պարունակող վանկարկումները։
Տարօրինակն այն է, որ ՀՀ ԿԳՄՍ-ն բավարարվել է Կարին Տոնոյանի ակնհայտ կեղծ տեղեկություններով և փաստացի հրաժարվել պատասխանատվության ենթարկելու որևէ գործիք կիրառել։ Որևէ կերպ գործուն քայլեր չի ձեռնարկել՝ բացի պարզաբանում պահանջելն ու այն ստանալը։ Մինչդեռ Կարին Տոնոյանը իր տարածած պարզաբանմամբ հոխորտալով հրավիրում էր ԿԳՄՍ ներկայացուցիչներին ներկայանալ դպրոց և տեսնել, թե ի՞նչ է նշանակում ազգային և ասպետական դպրոց ու կրթություն:ԿԳՄՍ-ն, հավանաբար, առանց այցելելու հավաստիացել է, թե ինչ է ասել ազգային և ասպետական դպրոցն ու կրթությունը և համաձայն է դպրոցի տարվող քաղաքականության հետ։