Որոտանի հրաշքը. Սատանի կամուրջ

Զարմանահրաշ է բնությունը` լի չքնաղագույն անկյուններով և անձեռակերտ հուշարձաններով, որոնք բնության համաշխարհային ժառանգության անբաժան մասն են կազմում:

Բնության ապշեցնող կոթողներից են բնական կամուրջները, որոնք գոյացել են դարերի ընթացքում: Բնական այդ կոթողներից են «Սատանի» կամուրջները։ Այո, այդ անունով աշխարհում բազմաթիվ կամուրջներ կան. Շվեյցարիայում, Ֆրանսիայում, Բուլղարիայում, այդ թվում նաև Հայաստանում։

Տաթևի վանքի ներքևի հատվածում՝ Որոտան գետի կիրճում է գտնվում Հայաստանի բնության հրաշքներից մեկը՝ Սատանի կամուրջը: Այն ձևավորվել է հազարամյակների ընթացքում ջրի և քամու անդադար ազդեցությունից, որոնք հղկել և փորել են սառած լավային զանգվածները։

Կամրջի երկարությունը մոտ 30 մետր է, լայնությունը` 60 մետր: Այն գտնվում է Որոտանի կիրճի ամենախոր հատվածում` 700-800 մետր։ Այդ հատվածում կիրճն այնքան նեղ է, որ արևի ճառագայթներն անգամ ի զորու չեն թափանցելու նրա հատակը:

Սատանի կամրջի տակ գտնվող բուժիչ հատկություններով օժտված տաք հանքային ջրերը գոյացրել են ջրավազաններ: Հանքային աղբյուրները գտնվում են հենց կամրջի տակ, որոնք լցվում են Որոտան գետը և այն դարձնում ավելի հորդառատ: Դրա շնորհիվ առաջին հայացքից թվում է, թե կամրջի տակով հոսում է սակավաջուր գետակ, սակայն փոխարենը կամրջից դուրս է գալիս ջրառատ Որոտանը: Հավանաբար, հենց այստեղից էլ ծագել է կամրջի անվանումը:

Նյութի հեղինակ՝ Սեդա Բարսամյան