Պղտոր ջուրը ի վերջո մաքրվում է և դրա համար ժամանակ է պետք.Ալեքսանդր Սայադյանը՝ հեղափոխությունը քարկոծողների մասին

Ալեքսանդր Սայադյանը ֆեյսբուքյան իր էջում նոր գրառում է հրապարակել։

ԵՐԿՈւ ԽՈՍՔ…
_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
ԿԳՄՍ ոլորտում փոփոխությունների որոշ հեղինակների ուղղությամբ երեկ իմ արած դիտողությունը ոմանք ընդունել են որպես առիթ հեղափոխությունը քարկոծելու և վարկաբեկելու համար։ Այդպիսիներին ուզում եմ ասել` քիչ ոգևորվեք։ Սխալներն ու բացթողումները տեսնելն ու, թեկուզ տարակուսանքով, դրանք մատնացույց անելը ամենևին չի նշանակում, թե դուք ճիշտ եք։ Միշտ էլ կլինեն առանձին անհատներ, որ կուզենան քար գցել փոփոխություններ իրականացնողների ճանապարհին, խանգարել նրանց, սակայն դա չի նշանակում, թե ճանապարհը սխալ է ընտրված և ինչ-որ “մասնագետների”, հնարավոր է և միտումնավոր արված, սադրիչ քայլերը ի զորու են շեղել ժողովրդի իրագործած հեղափոխության ուղին։ Հնի վերադարձը երազողների պակաս չի զգացվում, տականքները կարող են գլուխ բարձրացնել և փորձել խաթարել մեր ընթացքը։ Մեկ անգամ չէ, որ պատմությունը դրա վկան է եղել։ Նույնպես էլ մեկ անգամ չի եղել, երբ այդ խաթարողների ատամները փշրվել են, հանդիպելով հեղափոխության ժայռեղեն կամքին։ Սխալներ կան ու դեռ էլի են լինելու, բայց չեն սխալվում միայն ոչինչ չանողները։ Պղտոր ջուրը ի վերջո մաքրվում է և դրա համար ժամանակ է պետք։ Հավատում եմ, որ սխալները կուղղվեն։ Ինչպես ասում են, Մոսկվան էլ մեկ օրում չի կառուցվել։ Աստված պահապան մեր երկրին ու մեր ժողովրդին։