Այսօր տեղեկատվություն էր տարածվել, որ ՌԱԿ Լիբանանի շրջանային վարչության ատենապետ դոկտ. Ավետիս Դաքեսյանը միացել է ՀՅԴ-ին՝ Նիկոլ Փաշինյանի հրաժարականի պահանջով։ Նշվում էր նաև, որ ներկա պահին ՀՅԴ-ի հետ համատեղ գործակցության նույն ոգով ռազմավարություն են մշակում Լիբանանում՝ Նիկոլ Փաշինյանի հրաժարականի պահանջով համատեղ ակցիաներ կազմակերպելու։
«Սա սուտ է, սուտ է, սուտ է, մեր կենտրոնական վարչությունն այսօր հայտարարություն է տարածելու՝ հերքելով տարածված տեղեկատվությունը։
Սա Սևակ Հակոբյանի տարածած սուտն է»,-«Առաջին լրատվական»-ի հետ զրույցում ասաց Ավետիս Դաքեսյանը։ Նա նշեց, որ ՌԱԿ-ը շարունակում է աջակցել Նիկոլ Փաշինյանին․
«Մենք Նիկոլ Փաշինյանի հետ ենք և դեմ ենք Հայաստանի ներսում ծավալվող նրա հրաժարականը պահանջող շարժմանը։ Թող էլի ցույցեր անեն, բայց ինչո՞ւ են փակում փողոցները։ Ինչու են խանգարում աշխատանքի գնացողներին»,-ասաց նա։
Դաքեսյանը, անդրադառնալով Արցախը փրկելու՝ ընդդիմադիրների հայտարարություններին, նշեց, որ որ համաձայն չեն այս ձևակերպումներին․
«Մենք համաձայն չենք, համաձայն ենք, որ Հայաստանի իշխանությունները զգույշ լինեն Ադրբեջանի հետ համաձայնություններում, ասում են՝ մութ կետեր կան, դրանք շատ հստակ պիտի լինեն, և որևէ բան, որ պետք է ստորագրվի, ժողովուրդ պետք է տեղյակ լինի։ Սա է։ Բայց այս շարժման նախաձեռնողները հետին նպատակներ ունեն։ Պետք է սպասել մի քանի տարի, մինչև նոր ընտրություններ, և ով կանցնի ընտրություններին, նա էլ կղեկավարի երկիրը։ Սա է դեմոկրատական ճանապարհը»,-հավելեց Դաքեսյանը։