Այսօր՝ փետրվարի 11-ին, Ազգային ժողովում շարունակվում է հերթական նիստի աշխատանքը: Այժմ քննարկվում է Քրեական օրենսգրքում փոփոխություն կատարելու նախագիծը:
«Ես երկու ձեռքով կողմ եմ նախագծին, բայց կարծում եմ` մենք այնտեղ չենք փնտրում դավաճաններին, որտեղ նրանք են իրականում: Այն, ինչ կատարվում է ՀՀ-ում, պակաս դավաճանություն չէ: Մեդիա տեռորը պակաս դավաճանություն չէ, ի վերջո պետության զավթումն է դավաճանություն, որն այդպես էլ այս ԱԺ-ն խիզախություն չունեցավ գնահատական տալու:
Պետությունը կլեպտոկրատիայի վերածելն է դավաճանություն, և պետության անվտանգությունը այս վիճակին հասցնելն է դավաճանություն, Հոկտեմբեր 27 և Մարտի 1 թույլատրելն է դավաճանություն, բանակը թալանելն ու զինվորի հաշվին հարստանալն է դավաճանություն, մի քանի անգամ թանկ խոտան զենքի ձեռք բերումն է դավաճանություն, երկիրը քրեաօլիգարխիայի վերածելն է դավաճանություն, պետության գույքը պարտքի դիմաց օտարելն է դավաճանություն:
Ի վերջո, երկրի ինքնիշխանությունը առևտրի առարկա դարձնելն ու զինվորի վրա երկրի անվտանգության ամբողջ բեռը թողնելն է դավաճանություն»,- հայտարարեց անկախ պատգամավոր Արման Բաբաջանյանը: